ཨ་ཡིག་རིག་མཛོད།

སྙན་རྩོམ་མཆུ་སྦྲང་རོལ་མོ།  ལྗང་མྱུག

90



རྒྱ་སྤྲང་བྲང་རྡུང་གཟའ་ཟླ་གཉིས་ཀྱི་གཏམ་རྒྱུད་ལ་སྦྱར་བ།


༄༅། །ནུ་འབུར་རྒྱས་ཤིང་སྐེད་པ་རྡོ་རྗེ་སྤུན། །

མཆུ་སྒྲོས་རབ་དམར་ཚེམས་ཕྲེང་མུ་ཏིག་དཀར། །

དཔལ་མོ་སི་ཏཱ་ལ་སོགས་སྒེག་མོ་འབུམ། །                                                

ནགས་ཀྱི་སྤྲ་མོར་བསྒྱུར་བའི་མཚོ་བྱུང་མར། །                                        

ཟག་མེད་བདེ་དགའི་དཔལ་ལ་མཉམ་རོལ་ཞུ། །                               


སྡུག་པའི་བུ་ཡི་ལྗོན་པ་ལ། །                                                                

མ་ཡི་བྱམས་དང་བརྩེའི་གངས། །                                                

སྙིང་རྗེའི་དྲོད་ཀྱིས་བཞུས་པ་ཡི། །                                              

ཆབ་ཀྱིས་བརླན་མཐར་དུག་ཚེར་གྱི། །                                      

ཡལ་འདབ་རྒྱས་པ་འདི་ལ་ལྟོས། །                                          


རིང་ནས་ཚད་མེད་དྲིན་གྱིས་བསྐྱངས་པའི་བརྩེ་ཆེན་ལུས་ཀྱི་མཆོག་སྩོལ་མས། །                                                                              

དཔག་ཡས་དཀའ་བ་དུ་མས་རབ་གདུངས་ལུས་སེམས་ངལ་བའི་འོབས་སུ་འཕག །                                                                            

གཅེས་བའི་བུ་གང་དཔྲལ་བའི་མིག་དང་སྙིང་ཆུང་དམར་པོའི་ཟླར་བཟུང་མཐར། །                                                                          

མི་གཙང་གྲོང་མཐའི་ཐལ་བ་ཇི་བཞིན་གྲོང་རོང་ཟབ་མོར་སྟོར་བ་དེར། །                                                                                  

རྒྱུ་མའི་དོ་ཤལ་འཛིན་པ་རྣམས་ཀྱང་མ་རངས་སྡང་མིག་མེ་སྟག་མཆེད། །                                                                        


གཅེས་པའི་བུ་ལ་མ་ཡི་ཡིད། །                                                                    

རྗེས་སུ་འགྲོ་ལ་ཟླ་བྲལ་ཡང་། །                                                      

བྲང་འགྲོ་འོ་མས་གསོས་འདྲ་འདིས། །                                                

ཁྱི་དང་ཉེ་ན་རྨ་དང་ཉེ། །                                                

ཞེས་པའི་གསུང་གང་འཁྲབ་པ་བཞིན། །                                      


དར་མའི་སྐྱེ་བོ་རྣམས་ཀྱང་འགྲན་པ་ལྟར། །                                      

ལྟོ་གོས་སླད་དུ་གང་སར་མདུར་དགོས་ན། །                                  

རྒ་བས་ལུས་པོ་སྒུར་བའི་བགྲེས་མོ་འདི། །                                      

ཆུ་མོས་དོར་བའི་གྲོག་འདིར་ག་ཙམ་གསོན། །                                

གང་ཚེ་མི་ཡིས་དམན་པའི་དཔེར་འགོད་པའི། །                            

དུད་འགྲོ་ཁྱི་ཕྲུག་ན་ཚོད་མ་སྨིན་ཡང་། །                                                                              

བདག་པོ་བགྲེས་མོ་མུ་གེས་འཆི་བའི་ལམ། །                              

འབད་པས་ཟློག་པར་བརྩམ་འདིས་རྐང་གཉིས་ཚོ། །                                  

སྙིགས་མའི་ཕྱག་དར་ཁྲོད་དུ་སྐད་ཅིག་དེད། །                                    


ཁྱི་ལ་སྤུ་འཛིང་མཇུག་མ་ལྡན། །                                                        

མཆེ་གཙིགས་སྡེར་ཁྱིམ་རྩུབས་ནའང་། །                                            

སྙིང་ལ་དྲོད་ཀྱིས་མ་སྟོང་ན། །                                                      

ཕྱག་བྱའི་ཡུལ་དུ་ཅིས་མི་འགྱུར། །                                          


གྲང་བ་ལུས་ཀྱི་དྲོད་ཀྱིས་མ་བསལ་ཞིང་། །                                            

བཀྲེས་པ་བྲང་གི་ནུ་ཞོས་མ་གསོས་པའི། །                                                  

ག་ཤེད་ཡུལ་གྱི་རྔོན་པ་མཆེད་པོ་གསུམ། །                                    

ལན་གྱི་ཨ་མར་མཇལ་འདི་ཚེ་རབས་སྔོན། །                                    

ལས་ཀྱི་ཁ་ཆད་ཅི་ཞིག་བྱས་པས་ཡིན། །                                        

རྐང་གཉིས་གཙོ་བོའི་ཐུགས་ལ་རི་མོ་བཞིན། །                                   


བུ་ཡིས་བརྩེ་ཆེན་མ་དོར་བའི། །                                                  

ཚུལ་འདི་མ་མེད་རྔོན་པ་ཚོས། །                                              

མངོན་སུམ་མཐོང་བས་འདྲེན་བྱེད་རྣམས། །                                    

འགུལ་མེད་འདྲ་པར་བླངས་པ་ལྟར། །                                                    

དྲན་པ་སོས་ཚེ་དོན་མཐུན་གྱིས། །                                            

དགོས་འདོད་ནོར་བུ་རྙེད་པ་འདྲའི། །                                                    

དགའ་བ་དགའ་བའི་ཉམས་གང་གིས། །                                        

མཚོན་བྲལ་སྨྲ་བསམ་བརྗོད་ལས་འདས། །                                    


སྒྱུ་ལུས་ཤ་ཁྲག་ཕུང་བོས་མ་སྦྲེལ་ཞིང་། །                                        

ཞིམ་མངར་ནུ་འོས་ལུས་གནས་མ་བྱས་ཀྱང་། །                                            

བརྩེ་ཆེན་འོད་ཀྱིས་ལྷན་ཐབས་སྦྱར་བ་ཡིས། །                                

ཆུ་ཤེལ་དབང་བོ་སྐར་མས་བསྐོར་བ་དེས། །                                  

དབང་ཆེན་ས་གཞི་རྐང་སྟེགས་བྱེད་བཞིན་དུ། །                              

དྲོད་ཀྱི་བརྩེ་བ་འདི་ཀོ་སྨྲས་དང་མཚུངས། །                                 


མ་ཡི་ཟླ་ཤེལ་ཆ་ཤས་ཡོངས་རྫོགས་དེས། །                          

རྗེས་ཆགས་ཀུ་མུད་འདབ་མ་ལེགས་ཕྱེས་ནས། །                                  

འཛུམ་བརྒྱའི་སྒེག་པ་རབ་ཏུ་འབར་བའི་གཏམ། །                          

ཕྱོགས་བཅུའི་སྐྱེ་བོའི་རྣ་ཆར་གྱུར་དང་ལྷན། །                                    

སྐྱེས་ཐོགས་ར་ཡིག་གཉིས་པའི་ཁྱུ་ཚོགས་ཀུན། །                                

སྐར་མའི་གྲངས་དང་རྡུལ་ཚོགས་སྲོལ་ལ་འཕྱ། །                                  


མི་སྡོད་སྐད་ཅིག་འདས་པ་ཡི། །                                                        

དུས་ཀྱི་འགྲུལ་བ་རླུང་བཞོན་དེས། །                                              

ལོ་ཟླའི་ཉག་ག་ག་ཚོད་ཅིག །                                                          

བགྲོད་པ་བགྲང་མཁས་སུ་ཡིས་རྟོགས། །                                                          

ལན་གྱི་བུ་ཕྲུག་ཟླ་བ་གཞོན། །                                                      

དགའ་མའི་མཚོ་ལ་འཆར་ཉིན་གྱི། །                                          

དགེ་ལེགས་དུས་སྟོན་གསར་བའི་ཆར། །                                          

ཤ་ལས་མཆེད་པའི་སྙིང་གི་བུ། །                                                

གོས་མེད་གཅེར་བུར་མཐོང་བས་མ། །                                                  

སྙིང་བརྩེའི་མཚོ་ལ་སླར་ཡང་ལྷུང་། །                                            


འབྲོང་གི་རྭ་ལས་གྱེས་བའི་བུ་སེམས་དང་། །                                      

འབྲི་མོའི་འོ་མ་ལྟ་བུའི་མ་ཡི་སེམས། །                                              

མི་མཐུན་འགལ་བའི་མེ་ཆུ་ལྟག་སྤྲོད་འདིས། །                            

སྲིད་པ་འཁོར་བའི་མཚང་ལ་འཛུབ་མོ་བཙུགས། །                                


བསོད་ནམས་ཆུ་བོ་སྐམ་པ་ན། །                                                          

ཕྱི་རོལ་ཆུ་ཀླུང་བྱེ་བ་ཡང་། །                                                      

སྤྱད་པའི་ཡུལ་ལས་རབ་འགོངས་པའི། །                                                    

ཡི་དྭགས་རྐང་གཉིས་འདི་ལ་ལྟོས། །                                                

འདི་ཡིས་དམན་པའི་མཐར་ཐུག་པའི། །                                      

བརྩེ་བྲལ་འདྲེ་ལའང་བག་ཡོད་སྟེར། །                                       


ཚིག་གི་ཤོག་བུའི་ལོ་མས་སྤུད་པ་ཡི། །                                      

རིག་བྱེད་བཅོས་མའི་ལྗོན་གྲིབ་ཕོག་པ་ལ། །                                    

རི་སྐྱེས་རྙི་ལ་ཅི་བཞིན་བཤོལ་རྣམས་ཀྱི། །                                  

མིག་ཡིད་དཔྱིད་དུ་འདི་ཉིད་འབད་པ་བརྒྱས། །                            

བྱེད་པོ་ལྗང་མྱུག་འབོད་པ་གང་དེ་འོ། །                                      


སྤྱི་ལོ2019/11/1ནས་ཟླ11/16ཉིན་མཇུག་རྫོགས་པར་གྲུབ།




ཞར་བཀོད།



དྲན་འཆར་བྱིས་པའི་འཛུམ་ཀོང་།

ལྗང་མྱུག མཚོ་ལྷོ།

འབྱམས་ཀླས་གླེགས་བམ་མཚོ་རླབས་རྩེར། །

རྨོངས་བློའི་ཀོ་གྲུ་རབ་ངལ་ཞིང་། །

ཡིད་འཛིན་དགའ་མ་དྲན་པའི་དུས། །

མགོ་རུས་སྒྲོམ་ཆུང་འཐོར་ཐ་ཉེ། །


རླུང་གཤོག་ཐོགས་པའི་དུས་ཚོད་མདའ། །

མདུན་ནས་མདུན་ལ་ཅང་ཤེས་ལྟར། །

དེས་ན་ངུ་དང་དགོད་པ་ཡི། །

གླགས་ཤིག་ངས་ནི་རྙེད་མ་གྱུར། །


སྨྲ་སེང་རྩལ་དགུ་ལྷུན་རྫོགས་པའི། །

བསེ་རུའི་རྣམ་དཔྱོད་ངར་མ་ཡིས། །

ཀུན་རྨོངས་ཕ་བོང་འཐག་པའི་འཕྲུལ། །

ཐང་མར་བརྡལ་ལ་ཉིན་གཉིས་མཇལ། །


དྲན་པའི་མཚོ་ནང་འཛུམ་པ་ཡི། །

སེམས་ཀྱི་སྨིན་ལེགས་རི་བོང་འཛིན། །

རྒྱང་ན་ཁོ་བོ་དྲན་པའི་གཏམ། །

མིག་ཆུས་གླེང་ཚེ་འདར་བ་མཐོང་། །


འོན་ཏེ་ལས་མང་སྐུད་སྣེ་བརྒྱ། །

བྲང་འགྲོའི་མལ་ཚང་སློག་པ་ལྟར། །

གཅིག་ལས་གཅིག་སྣེ་འཁྱུག་པ་འདིས། །

འཕྲད་པའི་སྐལ་བ་རླུང་གིས་ཁུར། །


ཁྱེད་ལུས་བསིལ་ལ་དྭངས་པ་བཞིན། །

བདག་སྙིང་མཚོ་མོ་རྙོག་མི་སྲིད། །

དེ་ལྟ་ན་ནི་བརྩེ་དུང་གི། །

མཆུ་སྦྱོར་ཝུ་ཕྲེང་སིམ་སིམ་མོ། །

༢༠༢༡། ༤། ༣ཉིན།


༄༅། །ལྷ་རེག་ཁུགས་པའི་འཕུར་ལྡིང་རླུང་བཞོན་མ།

———རྒན་ཆུ་ཕྲན་མཆོག་གི་མདུན་དྲུང་ག་ལ་བར།

ལྗང་མྱུག མཚོ་ལྷོ།

བརྩེ་ཆེན་སྙིང་རྗེའི་ཟླ་འོད་ཟེགས་མ་འབུམ་ཕྲག་འཐོར་བའི་དགེ་ལེགས་དཔྱིད། །

རྗེས་ཆགས་ཀུ་མུད་འདབ་མ་ཡོངས་གྲོལ་ཡོན་ཏན་དྲི་བསུང་འབྱམས་བྱེད་པ། །

འདི་ཀོ་སུ་ཡིན་བདག་གི་བཤེས་གཉེན་དྲན་པར་ཕན་བདེའི་མཆོག་སྦྱིན་མཁན། །

གང་དུ་གནས་ཀྱང་ཞལ་འཛུམ་གསུང་སྙན་ངལ་དུབ་འབུམ་ཕྲག་གཞོམ་ལ་དཔའ། །


སོར་སྡོམ་ཐོར་ཅོག་ཉོན་མོངས་མེ་ལྕེས་ཡོངས་སུ་བསྲེགས། །

མི་སྡུག་མགོ་རུས་རེས་ཆད་མི་དགེར་ཁྲོ་འཛུམ་གཉེར། །

འདོན་ཡོན་མྱོས་ཆུས་རྩ་གསུམ་འཕྲུལ་འཁོར་ཀུན་ནས་བཞུས། །

ཀྱེ་མ་འདི་ཀོ་བརྩེ་ལྡན་ཁྱེད་དང་གྱེས་པའི་འབྲས། །


ཐོགས་བྲལ་མཁའ་ལ་ལྕགས་ཀྱི་དྲ་བས་དབེན། །

དབེན་པས་ཡོངས་བཏངས་དྲན་པ་རྒྱ་ལ་ཚུད། །

ཚུད་འདིས་རུས་རྐང་ཧུབ་ཀྱིས་རྔུབ་པ་ཡི། །

ཡི་མུག་སྐྱོ་གདུང་གཤེད་མའི་གྲི་རྩེ་རྣོ། །


སྲིད་ལམ་གཉན་འཕྲེང་ཉུལ་བའི་ཚེ། །

སྣ་ཚོགས་གྲོགས་ལ་བུ་ཡུག་འཚུབ། །

རེ་འགའ་སྨན་ལ་རེ་འགའ་གནོད། །

དེའི་ཚེ་ཁྱེད་དང་ཁྱེད་གསུང་དྲན། །


ཡིད་མཚོ་རྨང་ནས་དཀྲུགས་པའི་སྨིན་མོའི་ཚོགས། །

འཇམ་པའི་ཚིག་དང་བརྩེ་བའི་ཉམས་རྫོགས་ཀྱང་། །

རིན་བྲལ་ཚེ་ཡི་ཆ་ཤས་འཐུང་འགྱུར་བས། །

ལན་རེའི་ཞེད་སྣང་དུས་མཐའི་རྒུད་པའི་ཟིལ། །


ཟས་གོས་ཕྱི་ཡི་སྐྱིད་ཆས་མ་འཛོམས་མེད། །

བག་ཕེབས་ནང་གི་དགའ་བ་བརྟན་དུས་དཀོན། །

སྒྱུ་མའི་ཐོ་ཡོར་འདི་ལ་བློ་ཁེན་ནས། །

དཔྲལ་བའི་ཐིག་རིས་དེད་དེ་ད་དུང་འགྲོ། །


ཤ་ཁྲག་ཕུང་བོ་ལས་ཀྱི་ཕ་མས་གནངས། །

བློ་གྲོས་རྣོ་སོ་ཁྱེད་དང་ཁྱེད་ཚོས་བསྩལ། །

ཐོས་པའི་རྟུལ་ཞུགས་ད་དུང་མ་ཤོར་བ། །

བས་མཐར་འཁྱམ་ཚེ་རང་མདོག་བཟུང་རྟགས་ཙམ། །


གཞལ་དཀའི་སྐུ་དྲིན་ལྷུན་པོའི་དབུ་རྩེས་བསྡུ་བཞི་སྤྲིན་པའི་གདུགས་དཀར་འདེགས། །

དགེ་ལེགས་གསུང་གི་གྲིབ་བསིལ་དཔལ་གྱིས་རྨོངས་པའི་ཚ་གདུངས་ངང་གིས་སེལ། །

རབ་འཇིགས་སྲིད་པའི་འོབས་ལས་འདྲེན་པོ་པད་དཀར་ཐུགས་ཀྱི་ལྕགས་ཀྱུ་ལགས། །

ཚེ་ཚེ་རབས་རབས་སྟོང་གསུམ་ཁྱོད་ཀུན་གནས་ཀྱང་མཇལ་སྙིང་རྡོ་རྗེ་མཁྲེགས། །


2020/10/9ཉིན།


རྐུས་བཤུས་མི་ཆོག


རྩོམ་པ་པོ་ངོ་སྤྲོ།

ལྗང་མྱུག ལོ་རབས་དགུ་བཅུ་བའི་སྟོད་ལ་མཚོ་ལྷོ་འབའ་རྫོང་དུ་སྐྱེས། 2015ལོར་ནུབ་བྱང་མི་རིགས་སློབ་གྲྭ་ཆེན་མོའི་བོད་སྐད་ཡིག་སྡེ་ཁག་ནས་སློབ་མཐར་ཕྱིན། 2016ལོར་འབོལ་རྩོམ་ཆེད་དེབ་ཐོག་མ<<ཕལ་བའི་སྐད་ཆ>>པར་སྐྲུན་བྱས་ཤིང་། སྔ་ཕྱིར་འབོལ་རྩོམ"ཁྱིམ་པའི་གདོང་གྲོགས"དང་། "ཨ་མཚར་མཚར་དགུ།" "བོད་ཀྱི་གཞས་ཚིག་རྙིང་བ་སྐོར་ཞིག་གི་རྟ་ཁ་འཐེན་པ།"སོགས་དང་། སྙན་ངག"ཀུ་ཤུ་དམར་པོ།" "སྙིང་ཆུང་གི་འཕར་སྒྲ།" "ཁྱིམ་ལ་ལོག་པའི་མགུར"སོགས་དང་། རྩོམ་དཔྱད"སྒྲུང་ཐུང་རྩེད་ཆུའི་ཁྲེད་དགོད་བཀླགས་པ།"དང་། "ཟུར་མིག་གིས་རྨས་པའི་རྣམ་ཤེས་གཉོམ་པོ"སོགས་འབོལ་རྩོམ་དང་སྙན་ངག དཔྱད་བརྗོད་སོགས་རྩོམ་ཡིག་མང་པོ་བོད་ཀྱི་དུས་དེབ་དང་དྲྭ་བ་ཚགས་པར་སྣ་ཚོགས་སྟེང་སྤེལ་བཞིན་པ་ལགས་སོ། །

03.png


分享到: