ཨ་ཡིག་རིག་མཛོད།

ལམ།   མོག་བུ་ཡེ་ཤེས་སྐྱབས།

47


ཕ་ལགས། སྐད་ཆ་ཡང་ཡང་བསྐྱར་ནས་ཅི།

ངས་ནི་ཐོགས་རྡུགས་མེད་པར་བློ་ལ་སྐྱོར་ཡོང་།

མ་ལགས། མིག་ཆུ་ཤམ་ཤམ་གཏོང་དོན་ཅི།

ངས་ནི་འཁོར་བའི་བདེ་དགའ་ལམ་བྲོ་བསྒྲིགས་ཟིན།

ཐུགས་བདེ། བཞུགས་འཚལ།

ལམ་ནི་སྤྲིན་པ་དུམ་ཚིགས་ཀྱི་སྣེ་ནས།

ང་ཡི་རྐང་འོག་ཏུ་ལྷུང་ཡོད་པ་འདྲ་ཡང་།

ཐུར་དུ་བསྒྲིལ་བའི་གྲུ་གུ་དང་འདྲ་བར།

རྐྱ་བཤིག་ནས་དྲ་མ་ལིང་ཚེ་བཟོས་ཡོང་བ་ཅི།

ལམ་ལ་ཆས་དུས།

ལག་ནང་དུ་ཕ་ལགས་ཀྱི་སྐད་ཆ་བཟུང་ཡོད།

ལམ་ཚིགས་རེ་རེ་ནས་ལག་འཇུ་བྱས་ཀྱིན་ཡོང་བས།

ད་ནི་ང་ལ།

ཕ་ལགས་ཀྱི་སྐད་ཆས་ལྡེང་གིན་མི་འདུག


ལམ་ལ་ཆས་དུས།

མིག་ཟུང་དུ་མ་ལགས་ཀྱི་མིག་ཆུ་བསྡུས་ཡོད།

ལམ་ཚིགས་རེ་རེ་ནས་ཕྱི་མིག་གཟད་ཀྱིན་ཡོང་བས།

ད་ནི་ང་ལ།

མ་ལགས་ཀྱི་མིག་ཆུས་ལྡེང་གིན་མི་འདུག

རི་བོ་དག་ལ་ཡབ་ཆེན་ཞེས་བོས་ནས་ཡོང་། ཕ་ལགས།

ང་ཡི་མགོ་འཕང་ཁྱོད་ལྟར་མཐོ་དགོས་དཀའ་ཨང་།


གཙང་པོ་དག་ལ་མ་ཡུམ་ཞེས་བོས་ནས་ཡོང་། མ་ལགས།

ང་ཡི་སེམས་པ་ཁྱོད་བཞིན་གཙང་དགོས་ཁག་ཨང་།

གྲོགས་པོ། འཁྱགས་དུས་རྒྱབ་བསྙེས་ནས་འདུག་ས་དེ་ག་རེ།

གྲོགས་པོ། ལྟོགས་དུས་དྲོ་འཚལ་སའི་གནས་ཚང་དེ་ག་རེ།

གྲོགས་པོ།

འཇིག་རྟེན་གྱི་ཆེས་ཡིད་འོང་གི།

དྭངས་གཙང་གི།

རྙེད་དུ་དཀའ་བའི་ལམ་དེ་གང་ན།


ལམ་ནི་ཏག་ཏག

ཕ་ལགས་ཀྱི་ཞལ་གསུང་དུ་བསྐུངས་འདུག

ལམ་ནི་ཏག་ཏག

མ་ལགས་ཀྱི་མིག་ཆུ་རུ་འཁྱིལ་འདུག


03.png


分享到: