ཨ་ཡིག་རིག་མཛོད།

དཔལ་སྙན་མོ་རི་རྣམ་རྒྱལ་དགེ་ལྡན་དགོན།

141



         དཔལ་སྙན་མོ་རི་རྣམ་རྒྱལ་དགེ་ལྡན་དགོན་ནི།མདོ་ཁམས་སྒང་དྲུག་གི་ནང་ཚན་མདོ་ཁམས་ཟལ་མོ་སྒང་གི་ཆར་གཏོགས་པའི། མགོ་ལོག་འབུམ་པ་ཁག་གསུམ་གྱི་ཡ་གྱལ་སྟོད་དབང་ཆེན་འབུམ་གྱི་སའི་ཆར། དར་གྱི་སྙན་མོ་རི་ཞེས་ཡུལ་ལ་དགེ་བཅུ་དང་། ས་ལ་སྲུང་བཞི་སོགས་རང་ཆས་སུ་གྲུབ་པའི་དབེན་པའི་གནས་མཆོག་ཉམས་དགའ་བ་འདིར། རང་བྱུང་བཅོ་ལྔ་བའི་ནང་ཚན། དོན་འགྲུབ་ཞེས་པ་ས་མོ་ལུག་གི་ལོ་སྟེ། བོད་རྒྱལ་ལོ། 2046ཕྱི་ལོ་ 1919ལོའི་ནག་པ་ཟླ་བའི་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་དུས་སུ། མ་ཧཱ་པཎྜི་ཏ་ཨ་མདོ་དགེ་བཤེས་འཇམ་དཔལ་རོལ་བའི་བློ་གྲོས་མཆོག་དང་།   ས་སྐྱོང་མི་ཡི་དབང་པོ་དབང་ཆེན་མདོ་སྡེ་མཆོད་ཡོན་ཟུང་གིས་ཚོ་སེར་ཉེར་གཅིག་གི་བླ་དཔོན་མི་དྲག་ཆེ་དགུ་ཐམས་ཅད་ལ། གྲོས་མོལ་བྱས་མཐར་ཐམས་ཅད་གྲོས་མཐུན་བྱུང་ནས་དབང་ཆེན་སྟོད་པའི་སྤྱི་དགོན་དུ་ཕྱག་འདེབས་མཛད་པར་ ༧ གོང་ས་བཅུ་གསུམ་པ་ཐུབ་བསྟན་རྒྱ་མཚོ་མཆོག་དང་། རྒྱ་ནག་གོང་མའི་སྐུ་ཞབས་སུན་ཀྲུང་ཧྲན། རྣམ་གཉིས་ལ་དགོན་སྡེ་གསར་འཛུག་དགོས་ཚུལ་སྙན་གསན་ཕུལ་རྗེས། ཁོང་རྣམ་གཉིས་ནས་བཀའི་གནང་བ་ཐོབ། དེ་ནས་ཡུལ་འདིའི་སྐྱེ་འགྲོ་སྤྱིའི་བསོད་ནམས་དང་། དམ་པ་ཁོང་རྣམས་ཀྱི་ཐུགས་བསྐྱེད་དུས་སུ་སྨིན་ཏེ། འཇམ་མགོན་རྒྱལ་བ་གཉིས་པའི་ཐུགས་བསྐྱེད་ལས་གྲུབ་པའི་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ། ཚང་ལ་མ་ནོར་བ་འཛིན་སྐྱོང་སྤེལ་གསུམ་གྱི་སྒོ་ནས་དར་ཞིང་རྒྱས་པར་བྱེད་པའི་དགོན་སྡེ་འདི་ཉིད་ཕྱག་བཏབ། དེར་མ་ཟད་ལོ་དེ་ཉིད་དུ་དམ་ཆོས་འདུལ་བ་གཞི་གསུམ་གྱི་ཕྱག་ལེན་དངོས་གཙང་མཛད།   སངས་རྒྱས་ཀྱི་བསྟན་པ་དྲི་མ་མེད་པའི་དབུ་བརྙེས་ཏེ། འགྲོ་བའི་སྡུག་བསྔལ་གྱི་ཚ་གདུང་སེལ་བར་བྱེད་པའི་གྲིབ་བསིལ་གྱི་གདུགས་དཀར་པོ་ཡུག་གཅིག་གིས་ཁྱབ་པར་བྱས་སོ། །དེ་ནས་རིམ་བཞིན་དགེ་བཤེས་རིན་པོ་ཆེའི་གཟིམ་ཆུང་དང་། དཔོན་མདོ་སྡེའི་རྒྱལ་ཁང་སོགས་བཞེངས། ཚོ་བ་སོ་སོའི་གྲྭ་ཤག་གི་ས་གཏན་ཁེལ་བྱས་ནས་བཞེངས་བའི་འགོ་བརྩམས། ༧ རྒྱལ་དབང་བཅུ་གསུམ་པ་ཆེན་པོས་དགོན་འདིར་དཔལ་ལྡན་འབྲས་སྤུངས་དང་། སྨན་རྒྱུད་གྲྭ་ཚང་གཉིས་ཀྱི་ཕྱག་ལེན་དཀྱུས་གཅིག་ཏུ་དྲིལ་ནས་མདོ་སྔགས་ཟུང་འབྲེལ་གྱི་འཇམ་མགོན་བླ་མའི་རང་ལུགས་འཛིན་པ། དཔལ་སྙན་མོ་རི་རྣམ་རྒྱལ་དགེ་ལྡན་དགོན་ཞེས་མཚན་གྱི་ཅོད་པན་གསོལ།དགོན་འདིའི་མཁན་དགེ་ཕྱག་གསུམ་ལ་དཔལ་ལྡན་འབྲས་སྤུངས་དགོན་གྱི་མཁན་དགེ་ཕྱག་གསུམ་གྱི་གོ་གནས་དང་ཐོབ་རྟགས་བཅའ་ཡིག་གོས་སེར་ལ་བྲིས་པ་ཐམ་ལྡན་སོགས་གནང་། ཆེ་བོས་སྤྲུལ་སྐུ་གསུང་རབ་ཚང་ལ་སན་འོ་རུལ་ཐུ་ཞེས་མཁན་པོ་ཆེན་པོའི་གོ་གནས་དང་འཇའ་ས་གནང། དགོན་སྡེ་འདིར་ཡིག་ཆ་ཆེན་པོ་བཞིའི་ནང་ཚན་ཀུན་མཁྱེན་འཇམ་དབྱངས་བཞད་པའི་ཡིག་ཆ་གཞིར་བཞག་སྟེང་། རིག་ལམ་ཆུང་འབྲིང་ཆེ་བ། གྲུབ་མཐའ། གཞུང་གསར། སྐབས་དང་པོ། ཕར་ཕྱིན། དབུ་མ། འདུལ་བ།མཛོད་བཅས་འཛིན་གྲྭ་བཅུར་བྱས། ཨ་མདོ་དགེ་བཤེས་རིན་པོ་ཆེས་ཆོས་སྡེ་ཆེན་པོ་དཔལ་ལྡན་འབྲས་སྤུངས་སྒོ་མང་བླ་མ་འོད་ཟེར་ཆོས་གྲགས་དགོན་པ་འདིར་མངགས་ནས། ཆོ་འཕྲུལ་སྨོན་ལམ་ཆེན་མོ་གསར་འཛུགས་མཛད། 1936 ལོའི་ཟླ་དགུ་བའི་ཚེས་བཅུ་དགུ་ལ། ༧ ཀུན་གཟིགས་པཎ་ཆེན་དགུ་བ་ཐུབ་བསྟན་ཆོས་ཀྱི་ཉི་མ་མཆོག་ཆིབས་བསྒྱུར་བསྐྱངས་ཏེ་རིམ་གྱིས་རྨ་ཆུ་བཅད་ནས། ཚེས་ཉེར་གཅིག་ལ། གཙང་བླ་དྲུང་བསྟན་འཛིན། དབང་སྟོད་བླ་མ་དྲུང་བཀྲ་ཤིས་རྣམ་རྒྱལ། འབོས་པ་བླ་མ་རྩེ་མགོན་ནོར་ཆུང། པདྨ་འབུམ་བླ་མ་དཀའ་ཆེན་བསྟན་འགྱུར་སོགས་བླ་དཔོན་འགོ་དམངས་བཅས་རྟ་བ་སུམ་བརྒྱ་སྐོར་གྱིས་ཕེབས་བསུ་དང། དེ་ཁུལ་གྱི་གྲྭ་རིགས་རྣམས་ཀྱིས་མཆོད་རོལ་སེར་སྦྲེང་བཅས་དར་གྱི་སྙན་མོའི་མདོར་བཞུགས་སྒར་དུ་ཞབས་སོར་འཁོད་འཕྲལ་བླ་དཔོན་སྡེ་ཤོག་བཅས་ནས་བརྟེན་གསོལ་འདེགས་འབུལ་ཞུས། ཚེས་ཉེར་བཞིར་སྙན་མོ་དགོན་པའི་ཆེ་བོས་སྤྲུལ་སྐུ་གསུང་རབ་ཚང་དང་། ཝ་ཤུལ་ཆོས་སྐྱོང་མགོན་གཉིས་ཀྱིས་གཙོས་སེར་སྐྱ་སྤྱི་ནས་ཞུས་ངོར། དགའ་ལྡན་འབུལ་བླ་ངོ་འཁོར། དཔལ་ཡུལ་མཆོག་སྤྲུལ་སོགས་སེར་སྐྱ་བཞི་སྟོང་སྐོར་ལ་དུས་འཁོར་ལྷན་སྐྱེས་ཀྱི་རྗེས་གནང་བསྩལ། ཚེས་ཉེར་ལྔའི་ཉིན་སྙན་མོ་དགོན་དུ་སྤྱན་དྲངས་པར་སེར་སྦྲེང་བཅས་འདུ་ཁང་ཡང་སྟེང་གཟིམ་ཆུང་དུ་ཞབས་སོར་འཁོད་འཕྲལ་གསོལ་བཞེས་འདེགས་འབུལ་ཐོག དགའ་ལྡན་ལྷ་བརྒྱ་མ་དང་། དམིགས་བརྩེ་མ། དུས་འཁོར་སྨོན་ལམ་བཅས་ཀྱི་ལྗགས་ལུང་བསྩལ། སྤྲུལ་སྐུ་གསུང་རབ་དང་། མཁན་པོ་ཐབས་མཁས་གཉིས་ཀྱི་གཞུང་ཆེན་བཀའ་བོད་ལྔ་ལ་བགྲོ་གླེང་མཛད་པས་ཁོང་ཐུགས་དགྱེས་པ་མཛད་དེ། སྔར་རྒྱལ་དབང་བཅུ་གསུམ་པ་ཆེན་པོས་མཁན་དགེ་ཕྱག་གསུམ་ལ་གནང་པའི་ཐོབ་རྟགས་སོགས་སླར་ཡང་གཏན་ཁེལ་བྱས་ནས་རྒྱ་བོད་སོག་གསུམ་གྱི་དེ་ལྟར་ཁས་ལེན་དགོས་པ་དང། བརྩི་བཀུར་བྱེད་དགོས་པའི་བཀའ་ཤོག་ཀྱང་གོས་སེར་ལ་མཚལ་གྱི་ཡི་གེ་དང་ཕྱག་ཐམ་གྱིས་མནན་ཏེ་བསྩལ།   དེ་ལྟར་རིམ་བཞིན་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ་དར་ཞིང་རྒྱས་པར་གྱུར་ཏེ། མཁས་གྲུབ་གཉིས་ལྡན་གྱི་སྐྱེས་བུ་དམ་པ་གནམ་གྱི་ས་བཀབ་པ་ལྟ་བུ་་མང་དུ་བྱོན། ཕྱི་ལོ 1958 དགོན་སྡེ་འདིའི་ཆོས་སྒོ་བརྒྱབ། ཕྱི་ལོ་ 1962 ལོར་རང་ཁུལ་དུ་སྒོ་ཕྱེས་པའི་དགོན་པ་ཆེ་གྲས་བརྒྱད་ཀྱི་ཡ་གྱལ་གཅིག་ཡིན། སྐབས་དེར་དགོན་པར་གྲྭ་བ་ཉི་ཤུ་ལྷག་ཡོད་ཀྱང་མ་འགོར་བར་དགོན་སྒོ་སླར་བརྒྱབ། རིན་ཐང་གཞལ་མཐའ་བྲལ་བའི་རྟེན་གསུམ་དང་མཆོད་རྫས་མང་ཆེ་བ་རིག་གསར་གོད་ཆག་སྐབས་གར་སོང་ཆ་མེད་དུ་གྱུར། ཕྱི་ལོ་ 1980 ལོའི་ཟླ་ 10 ཚེས 21 མགོ་ལོག་ཁུལ་རིམ་པ་དང་། དར་ལག་རྫོང་རིམ་པས་དགོན་ཁག་ཆེ་གྲས་བརྒྱད་ཀྱི་གྲངས་སུ་སྒོ་ཕྱེས། ཨ་མདོ་དགེ་བཤེས་རིན་པོ་ཆེ་ཐུབ་བསྟན་ཆོས་འཛིན་འཇམ་དཔལ་རོལ་བའི་བློ་ལྡན་གཙོས། སྔོན་གྱི་དགེ་བའི་བཤེས་གཉེན་འགའ་ཞིག་གི་བཀའ་དྲིན་ལ་བརྟེན་ནས་དམ་ཆོས་འདུལ་བ་གཞི་གསུམ་གྱི་ཕྱག་ལེན་དང་། མདོ་ཕྱོགས་བཀའ་པོད་ལྔ་དང་། སྔགས་ཕྱོགས་རྒྱུད་སྡེ་བཞི་སོགས་མདོ་སྔགས་ཟུང་དུ་འབྲེལ་བའི་བསྟན་པའི་མེ་རོ་རྨང་ནས་གསོས། ལྷག་པར་ཕྱི་ལོ་ 2000 ལོར་ཨ་མདོ་དགེ་བཤེས་རིན་པོ་ཆེས་བཀའ་དྲིན་དང་ཐུགས་བསྐྱེད་ལ་བརྟེན་ནས། མདོ་སྨད་མགོ་ལོག་འཇང་དགུན་ཆོས་ཆེན་མོ་དགོན་འདིར་ཐོག་མར་ཚུགས་པ་ནས་བཟུང་། འཆད་ཉན་བཤད་སྒྲུབ་ཀྱི་བསྟན་པ་རིན་པོ་ཆེ་ཡར་ངོས་ཀྱི་ཟླ་བ་ལྟར་དར་ཞིང་རྒྱས་པར་གྱུར་བའི་སྐབས་ལགས་སོ། །


དགེ་བློ་བཟང་གིས་འདོན་སྤྲོད་གནང་།


03.png


分享到: